Иахьа, абҵарамза 3 рзы, Аботаника аинститут азал аҿы имҩаҧысит Аҧсны аҭҵаарадыррақәа ракадемиа 25 шықәса ахыҵра иазкны, секциала еихшаны, ҩымш имҩаҧысуаз Аспирантцәеи аҵарауаа ҿарацәеи рконференциа алҵшәақәа реихшьалара. Аилатәара иалахәын аконференциа аиҿкааҩцәеи алахәылацәеи. Ҩымштәи аусура алҵшәақәа ирылацәажәеит асекциақәа рнапхгаҩцәа. Урҭ рцәажәарақәа рҿы иааркьаҿны ирзааҭгылеит иҟаҵаз ажәахәқәа рхыҧхьаӡареи рыҭҵаарадырратә ҩаӡареи. Иҟан урҭ рыҩныҵҟа еиҳа иалыркаауазгьы. Аконференциа аиҿкааҩцәеи зхы алазырхәызи рыхьӡала ишьақәыргылаз арезолиуциаҿы иарбахеит уажәтәи аҭҵаарадырратә усмҩаҧгатә иагу-иабзоу ҳәа ирыҧхьаӡаз азгәаҭарақәа. Урҭ ируакуп анаҩстәи аконференциа, секциала еихшаны акәымкәан, аҭҵаарадырратә хырхарҭақәа зегьы еицырзеиҧшны еиҿкаазарц. Агуманитартә ҭҵаарадырра иаҿу ауаҩы аҧсабаратә ҭҵаарадырраҿы иҟоу аихьӡарақәа ртәы иаҳарц, дазыӡырҩырц. Аилатәараҿы иҳәан иҭыҵраны иҟоу аконференциа аматериалқәа реиқәыршәаразы авторцәа даҽазныкгьы ражәахәқәа аус рыдуланы, статианы идырхиарц шрыхәҭоу. Аҵарауаа ҿарацәа рконференциа иалахәыз еицҿакны ирҳәеит, асеиҧш иҟоу аусмҩаҧгатәқәа шхымҧадатәиу.