АЛАҲӘАРА

Аԥсны аҭҵаарадыррақәа ракадемиа ирыланаҳәоит 2023–2024-тәи аҵарашықәс азы аспирантурахь адкылара шыҟало абарҭ азанааҭқәа рыла:
  1. «Аџьынџьтәыла аҭоурых. Аҧсны аҭоурых» (07.00.01) – ҭыҧк (1);
  2. «Аҳәынҭқаарратәи амуниципалтәи напхгараҭара» (5.2.7.) – ҭыҧк (1);
  3. «Иаарту-азинтә (аҳәынҭқарра-зинтә)» ҭҵаарадыррақәа рыла (5.1.2). – ҭыҧк (1).
Аспирантура аҭаларазы арзаҳал ҩтәуп Аҧсны аҭҵаарадыррақәа ракадемиа апрезидент ихьӡала. Арзаҳал иацҵатәуп анаҩстәи адокументқәа:
  • – иреиҳау аҵаразы адипломи уи агәлаҵеи рыхкьыҧхьлаа;
  • – азҵаабӷьыц (анкета);
  • – аспециалистцәа ҿарацәа рзы – изылгаз аҵараиурҭа Аҵарауаа рхеилак аилатәара аҧкаанҵа агәылҩаа;
  • – иалху азанааҭ ала арефарат (кьыҧхь бӷьыцк рҟынӡа) иазҧхьагәаҭоу аҭҵаарадырратә напхгаҩы ихҳәаа ацҵаны;
  • – акьыҧхь збахьоу аҭҵаарадырратә усумҭақәеи, анџьнырра-техникатә ҧҵамҭақәеи аҭҵаарадырратә усура аҳасабырбақәеи рсиа;
  • – амедицинатә ршаҳаҭга (286-тәи аформа);
  • – апатреҭқәа 4 (шәагаала 3×4 иҟоу).
Атәылауаҩшәҟәи иреиҳау аҵаразы адипломи хаҭала ицәыргатәуп. Адкыларатә ҧышәарақәа мҩаҧгахоит 2023 шықәса, абҵарамза 14 инаркны ҧхынҷкәынмза 11-нӡа; Аҧышәарақәа қәҿиарала ирхысыз аспирантура иахыҧхьаӡалахоит 2024 шықәса ажьырныҳәа 1 инаркны. Адокументқәа рыдыркылоит 2023 шықәса, цәыббрамза 1 инаркны жьҭаарамза 2-нӡа Аҧсны аҭҵаарадыррақәа ракадемиа аспирантуреи акадрқәа разыҟаҵареи рыҟәшаҿы абри аҭыӡҭыҧ ала: Аҟәа ақ., ак. Марр имҩа, 9; аҭел: 921-80-88. 226-69-76; aspirant@mail.ru

ААР аспирантуреи акадрқәа разыҟаҵареи рыҟәша

АҴАРАУАА РЏЬАБАА АХӘ ҲАРАКНЫ ИШЬОУП

Аҧсны аҭҵаарадыррақәа ракадемиа 25 шықәса ахыҵра инадҳәаланы, Аҧсны Ахада Аслан Бжьаниа инапы зҵаиҩыз аусҧҟақәа инарықәыршәаны, аҭҵаарадырраҿы иҟаиҵаз ихатәы лагалеи, аҵарауаа ҿарацәа реиҵааӡараҿы иџьабааи рзы ААР академик Сергеи Бебиа ианашьоуп “Ахьӡ-Аҧша” аорден актәи аҩаӡара; алитератураҭҵаараҿы иибахьоу аџьабаазы Аҧсуаҭҵааратә институт алитература аҟәша аҭҵаарадырратә усзуҩ Руслан Қапба ианашьоуп “Ахьӡ-Аҧша” аорден аҩбатәи аҩаӡара; аҧсуа ҭҵаарадырраҿы ллагалазы, аҿар реиҵааӡараҿы илбахьоу аџьабаазы “Ахьӡ-Аҧша” аорден ахҧатәи аҩаӡара ланашьоуп Аҧсуаҭҵааратә институт аетнологиа аҟәша аҭҵаарадырратә усзуҩ Марина Барцыц. “Аҧсны аҭҵаарадырра зҽаҧсазтәыз аусзуҩ” ҳәа ахьӡ рыхҵоуп Аҧсуаҭҵааратә институт ахыҵхырҭақәа рыҟәша аҭҵаарадырратә усзуҩ Аслан Аҩӡба, Аҧсуаҭҵааратә институт абызшәа аҟәша аҭҵаарадырратә усзуҩ Нелли Аршба, Аҧсуаҭҵааратә институт аетнологиа аҟәша аҭҵаарадырратә усзуҩ Пиотр Кәыҵниа, Аҧсуаҭҵааратә институт абызшәа аҟәша аҭҵаарадырратә усзуҩ Леонид Саманба, Аекономикеи азини ринститут адиректор Заур Шьалашьаа, Аекономикеи азини ринститут аҭҵаарадырратә усзуҩ Александр Гәлиа.