Иахьа Аҧсны аҭҵаарадыррақәа ракадемиаҿы имҩаҧысит амедицинатә ҭҵаарадыррақәа рдоктор, М. Ф. Владимирски ихьӡ зху Москватәи аҭҵаарадырратә клиникатә институт апрофессор, аҳақьым Лали Михаил-иҧҳа Коӷониа “Акьыба чымазара аҽацәыхьчаразы агәҽанызаара” захьӡу, аспирантцәеи аҵарауаа ҿарацәеи рзы алекциа.
Аҧышәа ду змоу аҵарауаҩ, аҳақьым Л. М. Коӷониа занааҭла агәабзиарахьчара иадҳәаламгьы еилыркаартәеиҧш дазааҭгылеит иахьа адунеи аҿы зегь реиҳа ишәарҭоу ачымазара ауаҩы ицәа иалазар, еиликаарц азы иидырша, гәаҭарақәас дызхысша, хәышәтәышьас иамоу уҳәа, зыда ҧсыхәа ыҟам аинформациа.
Л. М. Коӷониа акырынтә инаҵшьны илҳәеит, ахацклаҧшра, аҽгәаҭара шаҭаху. Уи азы Аҧсны ишыҟоу зыҩаӡара ҳараку аҳақьымцәа аус ахьыруа Аонкологиатә центр. Иҳәатәуп, уи ацентр аҿы аҵарауаҩ иахьа ишлыдылкылоз ачымазцәа, аринахысгьы Аҧсны даацыҧхьаӡа адкыларақәа шымҩаҧылгало.
