Лаҵарамза 3 рзы имҩаҧысит Аҧсны аҭҵаарадыррақәа ракадемиа апрезидиум аилатәара.
Академиа апрезидент Зураб Џьапуа инапхгарала имҩаҧысуаз аилатәара иазҵаара хадақәаны иқәыргылан: Аҧсны аҭҵаарадыррақәа ракадемиа Академиақәа жәларбжьаратәи рассоциациа алалара; Академиа аспирантцәеи аҵарауаа ҿарацәеи рзы иазҧхьагәаҭоу амаҭәарқәа рхыхь хырхарҭа рацәала адыррақәа роурц азы иаарыҧхьо аҵарауаа рџьабаа ахәҧса ашәара; Академиа аиубилеи иадҳәаланы имҩаҧгаз аҵарауаа ҿарацәа рконференциа аматериалқәа еидызкыло аизга аҭыжьра; Аҧсны аҭҵаарадыррақәа ракадемиа апрезидиум анапаҵаҟа Аҵарауаа ҿарацәа рхеилак аҧҵара; Ҳаамҭа иақәҿызҭуа, есааира зыҽзырҿыцуа азҵаарақәа ҭҵаарадырратә блала рыхәаҧшразы, рылацәажәаразы атематикатә стол гьежьқәа реиҿкаара; ес-ҩышықәса аҵарауаа ҿарацәа рконференциа аиҿкаара.
Зураб Џьапуа, Гь. А. Ӡиӡариа ихьӡ зху аҭҵаарадырразы Аҳәынҭқарратә премиа анашьаразы акомиссиа ахантәаҩы иаҳасабала, аилатәара иалахәыз иреиҳәеит апремиа аиуразы ишалаҵоу аа-усумҭак.
ААР апрезидиум алахәылацәа зҵаарацыҧхьаӡа рхатәы гәаанагара ахҳәааны, аус ишазеиӷьхаша еизааибаганы аӡбамҭақәа рыдыркылеит.