АЛАҲӘАРА

Аҭҵаарадырразы Гь.А. Ӡиӡариа ихьӡ зху Аԥсны Аҳәынҭқарратә премиазы Акомиссиа апремиа аиуразы аконкурс шаарту рыланаҳәоит. Гь.А. Ӡиӡариа ихьӡ зху Аҳәынҭқарратә премиа ранашьахоит агуманитартәи аԥсабаратәи ҭҵаарадыррақәа рҿы иалкаахаз, ауаажәларратә зхаҵара ҭбаа зауз, Аԥсны Аҳәынҭқарра аҭҵаарадырра аҿиараҿы лагала дуны иҟалаз аусумҭақәа. Аҳәынҭқарратә премиа аиуразы иқәыргылазарц алшоит: хаҭалатәи авторцәа рмонографиатә усумҭақәеи аколлективтә монографиақәеи; анаукатә комментариқәеи иҷыдоу аҭҵаарадырратә аппарати зцу ҿырҳәалатәии ҩыралатәии ахыҵхырҭақәеи академиатә жәарқәеи ифундаменталтәу томрацәалатәи рҭыжьымҭақәа; иреиҳау аҵараиурҭақәа рзы иоригиналтәу, авторцәа рхаҭақәа ртеориатәи рексперименталтәи ҭҵаарақәа шьаҭас измоу, арҵага шәҟәқәа. Аҳәынҭқарратә премиазы иқәыргылазар ҟалоит аҵыхәтәантәи хышқәса рыла (2023–2025 шш.) акьыԥхь збахьоу аусумҭақәа. Аҳәынҭқарратә премиа аиуразы аусумҭақәа рықәыргылара азин рымоуп аҳәынҭқарратә ҭҵаарадырратә усбарҭақәеи аиҳабыратә ҵараиурҭақәеи рколлективқәа. Гь.А. Ӡиӡариа ихьӡ зху Аҳәынҭқарратә премиа аиуразы Акомиссиа аусумҭақәа аднакылоит 2026 шықәса, жәабранмза (февраль) 1 инаркны рашәарамза (ииун) 1-нӡа абри аҭыӡҭыԥ ала: Аҟәа ақ., акад. Н.И. Марр имҩа, 9, Аԥсны аҭҵаарадыррақәа ракадемиа, Гь.А. Ӡиӡариа ихьӡ зху Аҳәынҭқарратә премиа Акомиссиа. Аконкурс алахәхаразы иаҭаху адокументқәа:
  • аҳәынҭқарратә премиа ашьҭазааҩ инысымҩа;
  • аусурҭа аҟнытә иҟазшьарба;
  • акьыԥхь збахьоу иусумҭақәа рсиа;
  • атәылауаҩшәҟәы ахкьыԥхьлаа;
  • дықәзыргыло аусбарҭа ахеилак аилатәараҿы ирыдыркылаз аԥкаанҵа агәылҩаа;
  • иқәыргылахо аусумҭа (хә-екземплиарк);
  • аусумҭа ықәзыргыло аусбарҭа аҟынтә амҩақәҵаратә шәҟәы.
Ишәызцәырҵуа азҵаарақәа зегьы реилкаара шәылшоит абарҭ аҭелқәа рыла: +7(940)728-03-44; +7(840)226-77-13. Аҭҵаарадырразы Гь. А. Ӡиӡариа ихьӡ зху Аԥсны Аҳәынҭқарратә премиа анашьаразы Акомиссиа

АԤСНЫ АҬҴААРАДЫРРАҚӘА РАКАДЕМИА
аԥс
рус
eng

ЗУРАБ ЏЬАПУА VI АФОЛЬКЛОРҬҴААҨЦӘА УРЫСТӘЫЛАЗЕГЬТӘИ РКОНГРЕСС ИХЫ АЛАИРХӘИТ

Аԥсны аҭҵаарадыррақәа ракадемиа апрезидент, Урыстәылатәи аҭҵаарадыррақәа ракадемиа аҳәаанырцәтәи алахәыла Зураб Џьапуа март мза 18 инаркны 21 рҟынӡа Владимир ақалақь аҿы имҩаԥысуаз VI Афольклорҭҵааҩцәа Урыстәылазегьтәи рконгресс ихы алаирхәит.

Аҭҵаарадырратә форум еиднакылеит иԥхьагылоу аҵарауаа, афольклорҭҵааҩцәа, имаҭәашьартәым акультуратә ҭынха аганахьала аус зуа апрактикцәа. Урыстәылеи аҳәаанырцәтәи атәылақәеи 15 рҟынтәи 200-ҩык инареиҳаны рхы аладырхәит.

Аԥсны ахьӡала аҭҵаарадырратә форум далахәын Аԥсны аҭҵаарадыррақәа ракадемиа апрезидент, ареспубликаҿы иналукааша афольклорҭҵааҩ Зураб Џьапуа. Апленартә еилатәараҿы аҵарауаа афольклорҭҵаареи, антропологиеи, аетнографиеи ирызку ахырхарҭақәа рыла ажәахәқәа ҟарҵеит. Урҭ рхыԥхьаӡараҿы иҟан Зураб Џьапуа иажәахә «Кавказтәи афольклорҭҵаара: алҵшәақәеи аҿиаратә тенденциа хадақәеи». Уи иажәахә кьыԥхьхоит VI Афольклорҭҵааҩцәа Урыстәылазегьтәи рконгресс аҟынтәи иалкаау ажәахәқәа реизгаҿы.

Афольклорҭҵааҩцәа Урыстәылазегьтәи рконгресс 2006-тәи ашықәс инаркны ԥшьышықәса рахь знык имҩаԥысуеит. Урыстәылазегьтәи афольклорҭҵааҩцәа рконгресс аиԥыларақәа, иаарту аиҿцәажәарақәа, аҭҵаарақәеи апрактикатә усурақәеи реихшьаалақәа рымҩаԥгареи, иматериалтәым аетнокультуратә ҭынха аспециалистцәа рыбжьара аԥышәа аимдареи рзы акрызҵазкуа ҭыԥуп. Аҭҵаарадырратә форум аҿы еиҿкаан аинтерес зҵоу аусмҩаԥгатәқәа: аетнографиатә-документалтә фильмқәеи, ашәҟәқәеи, амонографиақәеи рпрезентациақәа.