Аԥсны аҭҵаарадыррақәа ракадемиа апрезидент Зураб Џьапуа Аџьынџьтәылатә еибашьра Ду аҿы игаз Аиааира 79 шықәса ахыҵра рыдиныҳәалеит аветеранцәа.
Аџьынџьтәылатә еибашьра Ду аҭоурых иагәылоуп ҳџьынџьуаа ргәымшәареи рфырхаҵареи ртәы зҳәо адаҟьақәа. Арҭ амшқәа рзы ҳара иаҳгәалаҳаршәоит Аиааира зхы ақәызҵаз аԥсадгьыл ахьчаҩцәа. Урҭ рыбжьара ирацәаҩуп аҭынч ԥсҭазаараҿы рнапы злакыз аҭҵаарадырратә ус аҿы аԥеиԥш ду ззыԥшыз, аха аибашьра адәаҿы зыҧсҭазаарақәа ҿахҵәаз аҵарауаа. Ари аныҳәа наунагӡа аҭоурых ианхалоит адунеи аҿы аҭынчра аиқәырхаразы афашизм иаҿагыланы хыцәнамырха иқәԥоз ажәларқәа иаадырԥшыз афырхаҵара иасимволны.
ААР ахада З. Џьапуа Аҧсны аҭҵаарадырратә еилазааара ахьӡала аветеранцәа аҭынч ҧсҭазаареи агәабзиара ҕәҕәеи рзеиҕьаишьеит.