Амшхәаҧштә аҟны аа-зҵаарак ықәгылан. Раҧхьатәи азкын Аҭҵаарадыррақәа ракадемиа 2024 шықәсазтәи аҭҵаарадыратәи аиҿкааратәи усурақәа раҳасабырба. ААР академик-маӡаныҟәгаҩ, академик Валентин Кәаҕәаниа иҟаиҵаз аинформациа ала, академиа иаҵанкуа аинститутқәа рыҳасабырбақәа шьаҭас иҟаҵаны, Азеиҧш еизаразы ажәахә азырхиуоп ҧсышәалеи урыс бызшәалеи. Уа хаз-хаҭала иазааҭгылахоит Аҭҵаарадыррақәа ракадемиа алахәылацәа шықәсык иалагӡаны инарыгӡаз аҭҵааратәи аиҿкааратә усқәеи, аҭыҧантәиқәеи жәларбжьаратәи афорумқәеи шаҟа рхы рыладырхәыз, иркьыҧхьыз астатиақәеи аусумҭақәеи, амонографиақәеи уҳәа анализ рыдҟаҵаланы, хәыц-хәыц еилыршәшәаны ажәахә аҿы иарбахоит. Анаҩс афилологиатә ҭҵаарадыррақәа рхырхарҭала ихьчоу акандидаттә диссертациазы изныктәу аексперттә хеилак аҧҵаразы азҵаара иазааҭгылеит. Ҧхынҷкәынмза 19, иаҳхысыз ашықәс азы Нарҭдырреи адәынтәи афольклорҭҵаареи рцентр аҭҵаарадырратә усзуҩ Саида Ҳаџьым афилологиатә ҭҵаарадыррақәа ркандидат иҩаӡара лыхҵаразы адиссертациа лыхьчеит «Аныҳәарақәеи ашәирақәеи аҧсуа фольклор аҿы» атемала. Аусумҭа ахәшьара азҭо аексперттә хеилак аилазаара шьақәырҕәҕәан аилатәараҿы. ААР аспирантцәа рҳасабырба иалацәажәеит аиҧылараҿы. Валентин Кәаҕәаниа иҟаиҵаз аинофрмациа ала ААР асистемаҿы иахьа аҵара рҵоит зеижәҩык аспирантцәеи х-ҩык аҭҵаарадырра ашьҭазааҩцәеи. Аҧсуаҭҵааратә институт аҿы быжьҩык ҭоуп, Аекономикеи азини ринститут аҿы аҵара рҵоит ф-ҩык, Аботаникатә институт аҿы – аӡәы, Аексперименталтә патологиеи атерапиеи ринститут аҿы – хҩык, ҩыџьа аҵара рҵоит Аекологиа аинститут аҿы. Дара аттестациа ишахысыз зыршаҳаҭуа адокументқәа академиаҿы ироуит ианаамҭаз. Аинститутқәа рнапхгаҩцәа ҷыдала хшыҩзышьҭра азыруеит аспирантцәа реиҵааӡара. Ҳазҭоу ашықәс азы аӡәы-ҩыџьа ахьчарақәа шырҧеиҧшу иҳәеит Валентин Кәаҕәаниа. Аҵыхәтәантәи ашықәсқәа рзы зыҧсҭазаара анаука иадызҳәаларц зҽазызшәаз аҿар рхыҧхьаӡара иацлеит. Аҧсны аҭҵаарадыррақәа ракадемиа апрезидент, ААР академик, афилологиатә ҭҵаарадыррақәа рдоктор Зураб Џьапуа иазгәеиҭеит дара адгылара шрыҭатәу. Акадртә потенциал аизырҳара аҳәынҭқарра зырҿио акәны ибоит аҵаруаҩ. Иара убасгьы Аҭҵаарадырратә ҵараҩаӡара ашьҭазааҩцәа рышьақәырҕәҕәара иалацәажәеит. Ишьақәыдырҕәҕәеит ААР ибиуџьеттәым аҧхьаӡара 2025 шықәсазтәи асметагьы. Анаҩс ииасит акадыртә зҵаарахь. ААР апрезидиум далырхит Аҟәатәи афизика-техникатә институт адиректор. Амаҵзура аҭыҧ азы аусбарҭа аколлектив дықәдыргылеит уажәазы еиҳабыс иамоу афизка-математикатә ҭҵаарадыррақәа рдоктор, апрофессор Анатоли Марколиа. Маӡалатәи абжьыҭарала Анатоли Марколиа Аҟәатәи афизика-техникатә институт еиҳабыс деиҭалхын. Аилатәара хыркәшо ААР апрезидент Зураб Џьапуа иҳәеит ииасыз ашықәсазтәи аусура аихшьаала иазку Азеиҧш еизара анымҩаҧырго апрезидиум аӡбамҭала еиуеиҧшым ахырхарҭақәа рыла зҽалызкааз аусзуҩцәа аҧаратә ҳамҭақәа шрыҭахо.
