Лаҵарамза 25, 2025 шықәса рзы имҩаҧысит Аҧсны Аҭҵаарадыррақәа ракадемиа апрезидиум изаамҭанытәиу аилатәара. Аҭҵаарадыррақәа ракадемиа апрезидиум ишьақәнарҕәҕәеит ААР аспирантурахь изаамҭанытәу адкыларазы аҭыҧқәа. ААР академик-маӡаныҟәгаҩ, академик Валентин Кәаҕәаниа иҟаҵаз аинформациа ала Аҧсуаҭҵааратә институт аҳәара ҟанаҵоит Аҧсны аҭоурых азанааҭ ала ҩ-ҭыҧк, акы-аҧсуа бызшәа ахырхарҭала. Аекономикеи азини ринститут ҧшь-ҭыҧк рзоурыжьырц. Аекологиа аинститут – х-ҭыҧк. ААР апрезидент Зураб Џьапуа иазгәеиҭеит атәыла ахада Бадра Гәынба ишақәиргәыҕыз астипендиақәа рыцҵара азҵаара ахаҵгылара аиуеит ҳәа. Аҵарауаҩ иҳәеит ихадараны ишыҟоу аспирантцәа русумҭақәа рыхьчара анагӡара. Афизика-математикатә ҭҵаарадыррақәа рхырхарҭала акандидаттә диссертациақәа рыхьчаразы Изныктәу адиссертациатә хеилак шьақәдырҕәҕәеит аилатәараҿы. ААР апрезидент ихаҭыҧуаҩ, ААР академик Ианварби Екба ишазгәеиҭаз ала, афизика-математикатә ҭҵаарадыррақәа ркандидатцәа Лолита Хынтәҧҳаи Есма Ҧачлиаҧҳаи рыҭҵарадырратә ҩаӡара шьақәзырҕәҕәо аусумҭақәа ахәшьара азҭо аексперттә хеилак аилазаара шьақәыргылахоит жәеизаҩык апрофильтә специалистцәа рыла. ААР апрезидиум аҿы еиҿкаау аҭоурых-культуратә ҭынха ахьчаразы Аҳәынҭқарратә комиссиа аилазаара ҿыц шьақәырҕәҕәан. Уи иалалеит хәҩык аспециалистцәа – Гарик Сангәлиа, Сергеи Шамба, Аркади Џьапуа, Алик Габелиа, иара убас Инал Џьапуа. Напхгаҩыс далхуп Алик Габелиа. Археологиатә комиссиа аҭакҧхықәра ду адуп, аҵыхәтәантәи аамҭазы изакәанымкәа ажрақәа мҩаҧызго рхыҧхьаӡара азгәаҭаны, иҳәеит ААР апрезидент Зураб Џьапуа. «Ажҩы еиқәаҵәақәа» ҳәа изышьҭоу акрызҵазкуа аҭоурыхтә артефактқәа аҳәаанырцә идәықәырҵоит, Аҧсны аҭоурых-культуратә ҭынха убри ала ааха арҭоит. Археологиатә комиссиа Аҧсны иахьаҵанакуа археологиатә баҟақәа рыҭҵаареи реиқәырхареи знапы алаку акыр зҵазкуа усбарҭоуп. Уи аусура ҳтәыла ибеиоу аҭоурыхтә ҭынха аиқәырхара иазырхоуп. Зураб Џьапуа ишазгәеиҭаз ала, уи анапынҵақәа ирхадараны иҟоуп ажрақәа рымҩаҧгаразы Иаарту абҕьыц изҭатәу, изыхәҭо аилыргареи аӡбареи. Аиадертә медицина аусхк арҿиара алзыршо ацентр аартра азҵаара иколлегацәа ирыдигалеит афизика-техникатә институт аиҳабы Анатоли Марколиа. Азеиҧш наплакы аартра аперспектива дуқәа адиҳәалоит аҵарауаҩ. Уи аҳәаақәа ирҭаӡаны ахәшәқәа раҧҵара ачымазцәа рыҧсҭазаара ахаҭабзиара акырӡа анырра анаҭоит, иҳәеит Марколиа. Апрезидиум алахәылацәа уи аӡбамҭа адгылара арҭеит, аха иазгәарҭеит макьана ибзиаӡаны аҭҵаара аҭахны ишыҟоу. Акьыба ачымазара зхәышәтуа аҳақьым Лали Кәаҕәаниа ажәалагала ҟалҵеит амедициантә усбарҭақәа рҿы аус зуа, аҧышәа мзоу еиуеиҧшым аспециалистцәа рыстатиақәа зныло ажурнал аҧҵаразы. Урҭ аматериалқәа рзырхазаауеит астудентцәа реиҧш, аспирантцәеи, аординаторцәеи. Уи адагьы дара уи ажурнал аҿы рыҭҵаарадырратә усумҭақәагьы ркьыҧхьыразы алшара роуеит. Апрезидиум алахәылацәа уи адгылара арҭеит, ас еиҧш иҟоу аҭыжьымҭа академиа астатус иҵегь иҳаранкуеит ҳәа азыҧхьаӡаны. ААР апрезидиум аҟны ирылацәажәеит егьырҭ азҵаарақәагьы.
