Аҧсны аҭҵаарадыррақәа ракадемиа апрезидент Зураб Џьапуа далахәын Афольклорҭҵааҩцәа ахҧатәи Сибратәи рфорум. Уи мҩаҧысуан рашәарамза 16 инаркны 20-нӡа. Жәлар рҟазара аҭҵаараҿы акры зҵазкуа аусмҩаҧгатә еиҿыркааит Урыстәылатәи аҭҵаарадыррақәа ракадемиа Сибратәи аҟәшеи, афилологиа аинститут «Сибреи Мрагылара харатәи ажәларқәа рфольклор абаҟақәа» ҳәа хьӡыс измоу асериа аредколлегиеи. Сибратәи ажәларқәа рхыҧхьаӡарала еуеиҧшым аетносқәа рганахьала даараӡа ирацәоуп. Урҭ узызҿлымҳахаша иҵаулоу атрадициатә культурақәа рымоуп, иҳәеит Зураб Џьапуа. Афорум ахәҭакзаара акры зҵазкуа усны дахәаҧшуеит аҵарауаҩ. Аусмҩаҧгатә еиднакылеит еиуеиҧшым акультурақәа аус рыдызуло еицырдыруа аҵаруаа. Дара ҳаамҭазтәи афольклорҭҵаара иацу апроблемақәеи, иара убасгьы еиуеиҧшым атәылақәеи ажәлрақәеи рҭынха аҭҵаара иадҳәалоу аҭҵаарақәа рылҵшәақәеи ирылацәажәеит. Алахәылацәа ргеиографиа акыр иҭбаан – Урыстәыла 23 региони, аҳәаанырцәтәи атәылақәа 10 рхаҭарнакцәа аҵанакит. Зураб Џьапуа Аҧсны аҭҵаарадыррақәа ракадемиа ахьӡала, ҳуниверситети ҳҵарауааи рыхьӡала афорум аҿы ааҧхьарала дықәгылеит. Уи анаҩс апленартә еилатәараҿы ажәахә ҟаиҵеит. Уи азкын аҧсуа жәабжьҳәаҩцәа рыҭҵаара, атипологиатә еишьашәаларақәа разгәаҭара. Ҩажәи хәба минуҭ иҟаз ажәахә даара азҿлымҳарыла ирыдыркылеит азыӡырыҩцәа. Лаҵарамза жәаа рзы Зураб Џьота-иҧа инеиҵыху аилатәарақәа руак рымҩаҧгара инапы ианырҵеит. Афорум аҿы зхы еилакыз аусқәа маҷымкәа иҟан. Зураб Џьапуа иубилеитә шықәсы инамаданы адныҳәалара ҟаҵан, ианашьан асимволтә ҵакы змоу аҳамҭа. Новосибирсктәи атәылаҿацә агубернатор Андреи Травников Аҧсны Аҭҵаардыррақәа ракадемиа апрезидент ааҧхьара ииҭеит ҧхынгәымзазы Новосибирск имҩаҧысуа идуӡӡоу жәларбжьаратәи атехнологиатә усмҩаҧгатә «Технопром-2025» ихы аилаирхәырц. Афорум аламҭалазы Зураб Џьапуа аофициалла дидикылеит Урыстәылатәи аҭҵаарадыррақәа ракадемиа апрезидент ихаҭыҧуаҩ, Сибратәи аҟәша ахантәаҩы Валентин Пармон. Аиҧылараҿы 2022 шықәса рзы ҳаҭҵаарадырратә усбарҭақәа рыбжьара нап зҵаҩыз аиқәшаҳаҭра аҳәаақәа ирҭагӡаны имҩаҧыргаша ауснагӡатәқәа ирылацәажәеит. Аенергетика, аҳауатә ҭагылазаашьа, афизика аусх, агуманитартә ҭҵаарадыррақәа уҳәа рганахьала конкретла ҳҵарауаа аус еицырур ахьалшо ахырхарҭақәа азгәарҭеит. Сибра иҟоу аҭҵаарадырратә хәышҭаарақәа адунеитә наукаҿы рҵакы дууп. Урҭ рылшарақәа ҳхы иархәаны Аҧснытәи аинститутқәа рпотенциал еиззырҳауа апроектқәеи апрограммақәеи аҧҵатәуп, иҳәеит Џьапуа. Урҭ ларҵәаразы ицәырҵуа афинастә зҵаарақәа рыӡбараҿы Валентин Пармон адгылара шааирҧшуа азгәеиҭеит.
