Аҧсны аҭҵаарадыррақәа ракадемиа апрезидиум гәалсра дула ирыдыркылеит Аҧсны жәлар рпоет, аиҭагаҩ, алитератураҭҵааҩ, акритик, Аҧсны аҭҵаарадыррақәа ракадемиа академик, афилологиатә ҭҵаарадыррақәа ркандидат Мушьни Лашәриа иҧсҭазаара иалҵра. Ҳаамҭазы Аҧсуаҭҵааратә институт алитература аҟәша деиҳабын, Аҧсны ашәҟәыҩҩцәа рассоциациа ахантәаҩра азиуан. Апоет-академик аҧсуа жәлари Аҧсынреи дрыхьӡырҳәаган. Аҭҵаарадырра, асахьаркыратә литература, иааидкыланы ҳдоуҳатә кульутра дацәыӡит зцәаҳәақәа ҳабиҧарақәа аӡәырҩы ҿырҳәала ирдыруа ажәа азҟаза. Мушьни Лашәриа иҟазара, акы иаламҩашьоз ипоезиатә баҩхатәра ду ҳара ҳтәыла анҭыҵгьы еицырдырхьеит, ҳәа азгәеиҭеит Аҧсны аҭҵаарадыррақәа ракадемиа Апрезидент Зураб Џьапуа. Мушьни Лашәриа иҧсҭазаара аиҳарак арҿиара иазикит. Бзиа иибоз аус инапы алакын 70 шықәса иреиҳаны. Мушьни Таииа-иҧа ианашьан хыҧхьаӡара рацәала Аҳәынҭқарратә, аиҳабыратә ҳамҭақәа – «Ахьӡ-аҧша» актәи аҩаӡара, «Аҳаҭыр дырга» аорденқәа, Д. Гәлиа ихьӡ зху аҳәынҭқарратә премиа, Александр Пушкин имедал, Дельвиг ихьӡ зху Урыстәылазегьтәи апремиа, Шоҭа Руставели ихьӡ зху аҳәынҭқарратә премиа.
Мушьни Лашәриа ирҿиарала аҧсуа милаҭтә литература ирбеиеит. Уи иҭынха еиқәырханы абиҧара ҿыцқәа ирызнагалатәуп.