Аҧсуа наука аҿиараҿы Гьаргь Шамба илагала ахә ашьара уадаҩуп. Инапы иҵыҵит ҩышә инареиҳаны аҭҵаарадырратә усумҭақәа, урҭ рхыҧхьаӡарахы – жәиҧшь монографиа. Иазгәаҭатәуп, иара аҧсышәалагьы дшыҩуаз, ибзоурала еиқәыршәаны иҭыжьын ихатәы бызшәала анаукатә усумҭақәа маҷымкәа. Уи адагьы Аҧсны аҭоурых азы арҵага шәҟәы авторцәа дыруаӡәкуп. Имчқәа рыла имҩаган хыҧхьаӡара рацәала аекспедиациақәеи аҭҵаарақәеи. Аҵыхәтәантәи имонографиақәа ҩба рзы иара ианашьоуп Гьаргь Ӡиӡариа ихьӡ зху аҳәынҭқарратә премиа. Иалкаау иаартра ҿыцқәа Алада Ешыра ақыҭа иҧшааз артефактқәа ирыдҳәалоуп. Ешыратәи абаагәараҿы аусурақәа мҩаҧигон жәашықәса инареиҳаны. Иаҳҳәар ҟалоит уи инҭкааны иҭиҵааит ҳәа. Иҧсҭазаара зегьы анаука иазикит. Иҭҵаарадырратә усура инаваргыланы, арҵаҩрагьы аанижьуамызт. 1996 шықәсазы Аҧснытәи аҳәынҭқарратә университет апрофессор ҳәа ахьӡ ихҵан.
Гьаргь Шамба иҭҵаамҭақәа иаарылукаауеит Ажәытә Аҟәа ҳәа захьӡу 2005 шықәсазы иҭыҵыз имонографиа. Уи аҧхьагьы ижәытәӡатәиу Аҟәа иазкны имаҷымкәа астатиақәа икьыҧхьхьан. Ақырҭуа ҵарауааи иареи уи азы акырынтәгьы аимак-аиҿак роухьан. Аха Гьаргь Кәыҷа-иҧа иархеологиатә ҧшаарақәа рыла рырҵабырга илшон ҳҭоурых адаҟьақәа, ицәырыргоз азҵаарақәа рҭакқәа афактқәа рыла ишьақәдырҕәҕәон иҭҵаамҭақәа.
Гьаргь Шамба ианашьоуп Қырҭтәылатәи ССР, иара убас Аԥснытәи ССР Иреиҳаӡоу Асовет Апрезидиум аҳаҭыртә бӷьыцқәа, “Ахьӡ-Аԥша” аорден III аҩаӡара, иара убас аҭҵаарадырра ахырхарҭаҿы Гь.К. Ӡиӡариа ихьӡ зху Аҳәынҭқарратә премиа. Аҭоурыхтә ҭҵаарадыррақәа рдоктор, Аԥсны Аҭҵаарадыррақәа Ракадемиа академик, археолог Гьаргь Шамба иԥсҭазаара далҵит жьҭаарамза 6, 2006 шықәсазы.
Археолог нага Аҧсны аҭҵаарадырратә дунеи азы зеиҧш ыҟам аҭынха аанижьит.