Аҭҵаарадырратә журнал ҭыҵуеит ҩ-сериакны: агуманитартә ҭҵаарадыррақәа рсериеи аԥсабаратә ҭҵаарадыррақәа рсериеи ҳәа. Агуманитартә сериа 15-тәи аномер иагәылалеит 20 статиа, урҭ еихшоуп 12 рубрика рыла.
ААР Адырраҭара редактор хадас дамоуп академик З.Џь. Џьапуа. Аҭакзыԥхықәу аредакторцәа: И.Д. Анчабаӡе, В.А. Чрыгба. Аҭыжьҩы-редакторцәа: С.О. Ҳаџьым, Н.С. Барцыц.
Аԥсабаратә ҭҵаарадыррақәа рсериа ҩ-номеркны иҭыҵит. 15-тәи аномер иагәылалеит афизико-математикатәи атехникатәи ҭҵаарадыррақәа, амедико-биологиатәи ақыҭанхамҩатәи ҭҵаарадыррақәа рхырхарҭақәа рыла 22 статиа. 16-тәи аномер иагәылалеит афизико-математикатәи атехникатәи ҭҵаарадыррақәа, амедико-биологиатәи ақыҭанхамҩатәи ҭҵаарадыррақәа рхырхарҭақәа рыла 17 статиа.
ААР Адырраҭара редактор хадас дамоуп академик З.Џь. Џьапуа. Аҭакзыԥхықәу аредакторцәа: С.М. Бебиа, И.А. Екба. Аҭыжьҩы-редакторцәа Е.Ф. Џьакониа, Т.И. Алексеева.
АЛАҲӘАРА
Аҭҵаарадырразы Гь.А. Ӡиӡариа ихьӡ зху Аԥсны Аҳәынҭқарратә премиазы Акомиссиа апремиа аиуразы аконкурс шаарту рыланаҳәоит. Гь.А. Ӡиӡариа ихьӡ зху Аҳәынҭқарратә премиа ранашьахоит агуманитартәи аԥсабаратәи ҭҵаарадыррақәа рҿы иалкаахаз, ауаажәларратә зхаҵара ҭбаа зауз, Аԥсны Аҳәынҭқарра аҭҵаарадырра аҿиараҿы лагала дуны иҟалаз аусумҭақәа. Аҳәынҭқарратә премиа аиуразы иқәыргылазарц алшоит: хаҭалатәи авторцәа рмонографиатә усумҭақәеи аколлективтә монографиақәеи; анаукатә комментариқәеи иҷыдоу аҭҵаарадырратә аппарати зцу ҿырҳәалатәии ҩыралатәии ахыҵхырҭақәеи академиатә жәарқәеи ифундаменталтәу томрацәалатәи рҭыжьымҭақәа; иреиҳау аҵараиурҭақәа рзы иоригиналтәу, авторцәа рхаҭақәа ртеориатәи рексперименталтәи ҭҵаарақәа шьаҭас измоу, арҵага шәҟәқәа. Аҳәынҭқарратә премиазы иқәыргылазар ҟалоит аҵыхәтәантәи хышқәса рыла (2023–2025 шш.) акьыԥхь збахьоу аусумҭақәа. Аҳәынҭқарратә премиа аиуразы аусумҭақәа рықәыргылара азин рымоуп аҳәынҭқарратә ҭҵаарадырратә усбарҭақәеи аиҳабыратә ҵараиурҭақәеи рколлективқәа. Гь.А. Ӡиӡариа ихьӡ зху Аҳәынҭқарратә премиа аиуразы Акомиссиа аусумҭақәа аднакылоит 2026 шықәса, жәабранмза (февраль) 1 инаркны рашәарамза (ииун) 1-нӡа абри аҭыӡҭыԥ ала: Аҟәа ақ., акад. Н.И. Марр имҩа, 9, Аԥсны аҭҵаарадыррақәа ракадемиа, Гь.А. Ӡиӡариа ихьӡ зху Аҳәынҭқарратә премиа Акомиссиа. Аконкурс алахәхаразы иаҭаху адокументқәа:- аҳәынҭқарратә премиа ашьҭазааҩ инысымҩа;
- аусурҭа аҟнытә иҟазшьарба;
- акьыԥхь збахьоу иусумҭақәа рсиа;
- атәылауаҩшәҟәы ахкьыԥхьлаа;
- дықәзыргыло аусбарҭа ахеилак аилатәараҿы ирыдыркылаз аԥкаанҵа агәылҩаа;
- иқәыргылахо аусумҭа (хә-екземплиарк);
- аусумҭа ықәзыргыло аусбарҭа аҟынтә амҩақәҵаратә шәҟәы.
