Анаука еиуеиҧшым аусхкқәа рҿы аимадарақәа рышьақәыргылареи рырҿиареи ирыҵаркуа азҵаарақәа ирылацәажәеит. Аиҧылара мҩаҧысит аибадырратәҟазшьа аманы. Атәыла иреиҳаӡоу анаукатә усбарҭа апрезидент Зураб Џьапуа академиа аусура аиҿкаашьеи, уи ашьақәгылара аҭоурыхи дырзааҭгылеит ҳџьынџьуаа бзиала шәаабеит ҳәа раҳәо. Џьапуа иазгәеиҭеит дара рыҩныҟа ишааз. Иҳәеит аҭҵаарадырра иадҳәало еиуеиҧшым ахырхарҭақәа рыла аус рыцура дшазыхио.
Диузџье ауниверситет аҿы иаҧҵоу «Кавказ абызшәақәеи акультуреи» рыҟәша анапхгаҩы Феҳми Ӡыба иазгәеиҭеит иахьа ҳара ҳкультуратә ҭынха дуи, ҳатрадициақәеи, ҳабызшәеи реиқәырхареи реихаҳареи еицаҳзеиҧшу актуалра змоу зҵаараны ишықәгылоу. Иҳәеит Ҭырқәтәыла инхо аҧсуа диаспора уи бзианы ишеилыркаауа, хьаасгьы ишрымоу. Убри азгәаҭаноуп, 2024 шықәса рзы аҧсуа бызшәеи алитературеи рыҟәша шаартыз.
Аҭҵаарадыррақәа ракадемиа иаҵанкуа аинститутқәа рхадацәа рнапы злаку аусхкқәа ирзааҭгылеит. Ҳџьынџьуаа ирзеиҭарҳәеит иарбан хырхарҭақәоу еиҳа аҧыжәара змоу, аусеицуразы алшарақәа аҧҵахар ахьалшо. Аиҧылараҿы иазгәаҭан аҭҵаарадырра аусхк аҿы аимадарақәа раҧҵареи рырҿиареи ишазыхиоу.
АЛАҲӘАРА
Аҭҵаарадырразы Гь.А. Ӡиӡариа ихьӡ зху Аԥсны Аҳәынҭқарратә премиазы Акомиссиа апремиа аиуразы аконкурс шаарту рыланаҳәоит. Гь.А. Ӡиӡариа ихьӡ зху Аҳәынҭқарратә премиа ранашьахоит агуманитартәи аԥсабаратәи ҭҵаарадыррақәа рҿы иалкаахаз, ауаажәларратә зхаҵара ҭбаа зауз, Аԥсны Аҳәынҭқарра аҭҵаарадырра аҿиараҿы лагала дуны иҟалаз аусумҭақәа. Аҳәынҭқарратә премиа аиуразы иқәыргылазарц алшоит: хаҭалатәи авторцәа рмонографиатә усумҭақәеи аколлективтә монографиақәеи; анаукатә комментариқәеи иҷыдоу аҭҵаарадырратә аппарати зцу ҿырҳәалатәии ҩыралатәии ахыҵхырҭақәеи академиатә жәарқәеи ифундаменталтәу томрацәалатәи рҭыжьымҭақәа; иреиҳау аҵараиурҭақәа рзы иоригиналтәу, авторцәа рхаҭақәа ртеориатәи рексперименталтәи ҭҵаарақәа шьаҭас измоу, арҵага шәҟәқәа. Аҳәынҭқарратә премиазы иқәыргылазар ҟалоит аҵыхәтәантәи хышқәса рыла (2023–2025 шш.) акьыԥхь збахьоу аусумҭақәа. Аҳәынҭқарратә премиа аиуразы аусумҭақәа рықәыргылара азин рымоуп аҳәынҭқарратә ҭҵаарадырратә усбарҭақәеи аиҳабыратә ҵараиурҭақәеи рколлективқәа. Гь.А. Ӡиӡариа ихьӡ зху Аҳәынҭқарратә премиа аиуразы Акомиссиа аусумҭақәа аднакылоит 2026 шықәса, жәабранмза (февраль) 1 инаркны рашәарамза (ииун) 1-нӡа абри аҭыӡҭыԥ ала: Аҟәа ақ., акад. Н.И. Марр имҩа, 9, Аԥсны аҭҵаарадыррақәа ракадемиа, Гь.А. Ӡиӡариа ихьӡ зху Аҳәынҭқарратә премиа Акомиссиа. Аконкурс алахәхаразы иаҭаху адокументқәа:- аҳәынҭқарратә премиа ашьҭазааҩ инысымҩа;
- аусурҭа аҟнытә иҟазшьарба;
- акьыԥхь збахьоу иусумҭақәа рсиа;
- атәылауаҩшәҟәы ахкьыԥхьлаа;
- дықәзыргыло аусбарҭа ахеилак аилатәараҿы ирыдыркылаз аԥкаанҵа агәылҩаа;
- иқәыргылахо аусумҭа (хә-екземплиарк);
- аусумҭа ықәзыргыло аусбарҭа аҟынтә амҩақәҵаратә шәҟәы.
