Амшхәаҧштә аҟны ҩ-зҵаарак ықәгылан. Раҧхьатәи азкын Аҧсышәала иаҧҵоу аҭҵаарадырратә усумҭазы ААР апрезидиум апремиа анашьара иаҧсахаз икандидатура ашьақәырҕәҕәара. Акьыҧхь збаз аҿар ирҩыз аусумҭақәа рыхәаҧшразы акомиссиа алхын. ААР академик-маӡаныҟәгаҩ, академик Валентин Кәаҕәаниа иҟаиҵаз аинформациа ала агуманитартә хырхарҭада сынтәа уаҳа усумҭа рмоуӡеит аҧсышәала, иара уигьы акоуп.
Аҵарауаа ҿарацәа аҧсышәала иаҧҵоу рыҭҵаарадырратә усумҭақәа ААР апремиа анашьаразы 2023 шықәса ахьӡала дықәыргылоуп аҧсуаҭҵааратә институт алитературатә ҟәша аусзуҩ Инал Гыцба. «Иуа Коҕониа: изызхьаҧштәу фактқәак (иҧсҭаззареи ирҿиареи ирыдҳәаланы)» ҳәа хыс иамоуп иусумҭа. Акомиссиа иҟанаҵаз алкааҿы иарбоуп И.Г. Гыцба Аҧсны аҭцаарадыррақәа ракадемиа иатәу аспирантураҿы азыҟаҵара бзиа зауз, иахьа аҧсуа литератураҭҵаара амхурсҭа ҽышәала иҭаханденуа ҳҵарауаа ҿарацәа дышреиуоу. Иааиҧмырҟьаӡакәа ихы рылалирхәуеит еиуеиҧшым аҭыҧантәии жәларбжьаратәии аҭцаарадырратә форумқәа, инапы ихижьеит Аҧсни уи анҭыҵи акьыҧхь збахьоу, апсышәалеи урысшәалеи иаҧҵоу аҭҵаарадырратә усумҭақәа жәпакы. Убарҭ иреиуоуп уажә аицлабрахь иаашьҭу иусумҭагьы. Иара кьыҧхьын ажурнал «Алашара» Nº 3 аҿы.
Гыцба ишьтихыз аҭцаарадырратә тема ганрацәала ишҭиҵааз, дыззаҭгыло азҵаарақәа инарҵауланы, насгьы қәнагала анализ рахыжьшьа дшақәшәо азгәарҭеит акомиссиа алахәылацәа. Автор апремиа иҭахоит аҭҵаарадырра амш аҽны. Аҧсны аҭҵаарадыррақәа ракадемиа апрезидент, ААР академик, афилологиатә ҭҵаарадыррақәа рдоктор Зураб Џьапуа иазгәеиҭеит хҩык апремиа ранаршьартә еиҧш аҭагылазаашьа шрымоу, аха аҧсышәала иҩу аусумҭақәа шыҟамлаз. Ҩажәи хәба нызқь рацәамзаргьы, аҭҵаарадыррахь зхы зырхо аҿар рзы стимулк ишаҩызахо иҳәеит.
Анаҩс апрезидиум алахәылацәа азааҭгылеит жьҭаарамза 24-25 рзы Аҧсны аҭҵарадыррақәа ракадемиа имҩаҧнаго Аҧсны аҵарауаа ҿарацәа аҩбатәи рыҭҵаарадырратә форум. Агуманитартә, асоциалтә, ауаажәларратә ҭҵараадыррақәа, афизика-математикатәи амедика-биологиатәи ҭҵаарадыррақәа рхырхарҭала ажәахәқәа рыманы иқәгылоит аҵарауаа ҿарацәа. Аконференциа актәи амш аҽны ашьыжь асааҭ жәаба рзы имҩаҧгахоит аартреи апленартә еилатәареи Аботаникатә институти Ақыҭанхамҩа аинститути аконференц зал аҿы. Уи аҳәаақәа ирҭагӡаны иӡыргахоит Актәи афорум аусумҭақәа реизга. Уи ашьҭахь иазгәаҭоуп асекциақәа рыла аусура. Аҭҵаарадырра амшныҳәа азгәаҭара иадҳәалоу азҵаарақәагьы ирыхәаҧшын аилатәараҿы.