Аԥсны аҭҵаарадыррақәа ракадемиа (ААР) апрезидиум ирыланаҳәоит 2021 шықәсазы иҭыҵыз аԥсышәала иҩу аҵарауаа ҿарацәа (40 шықәса ирҭымсыц) рыҭҵаарадырратә усумҭақәа апремиа ранашьаразы аицлабра (аконкурс) шаарту.
Аицлабрахь иқәыргылазар ҟалоит амонографиақәа, астатиақәа реизга, хазы игоу астатиақәа.
Аусумҭақәа рықәыргылара азин рымоуп ААР иаҵанакуа аҭҵаарадырратә институтқәа, Аԥснытәи аҳәынҭқарратә университет.
Аицлабра аҽалархәразы ажәалагала иацҵатәуп анаҩстәи адокументқәа:
— аусумҭа ықәзыргыло рҟынтә арзаҳал, аԥкаанҵа агәылҩаа, автор иҟазшьарба, насгьы ихаҭара зыршаҳаҭуа Аԥсны Аҳәынҭқарра атәылауаҩра ахкьыԥхьлаа;
— аусумҭа ахаҭеи аелектронтә версиеи;
Аматериалқәа аконверт иҭаҵаны иалагалатәуп.
Иаиааиз хҩык авторцәа дасу иранашьахоит апремиа: ашәҟәы иазыԥҵәоуп 50 000 (ҩынҩажәи жәаба) нызқь мааҭ, астатиа – 25 (ҩажәи хәба) нызқь мааҭ аԥаратә ҳамҭа.
Аҳамҭақәа ранашьара мҩаԥгахоит 2022 шықәса, жьҭараамза 30, Аԥсны аҭҵаарадырра амш аҽны.
Аконкурс ахь адокументқәа рыдыркылоит ҳазҭоу ашықәс лаҵарамза 2-нӡа абри аҭыӡҭыԥ ала: ақ. Аҟәа, ак. Марр имҩаду, 9; аҭел: +7940-771-23-45;
E-mail: akademana@mail.ru
ААР апрезидиум