Аҧсны аҭҵаарадыррақәа ракадемиаҿ ҧшьҩык аспирантцәа рнапаҿы ирыҭан аршаҳаҭгақәа.
Амҧар Адгәыр Баҭал-иҧа, Ҵәыџьба Рашид Адамыр-иҧа, Инаҧшьба Инал Гаврил-иҧа, Кәыпалба Хамида Гарри-иҧҳа, қәҿиарала аҧышәарақәа ҭины, Аҧсны аҭҵаарадыррақәа ракадемиа иатәу аинститутқәа распирантура иҭалеит.
Амҧар Адгәыр аҭоурых иазку адиссертациа иҩуеит Аҧсуаҭҵааратә институт аҿы, Ҵәыџьба Рашид – Аботаника аинститут аҿы, Инал Инаҧшьбеи Хамида Кәыпалҧҳаи – Аекономикеи азини ринститут аҿы.
ААР академик-амаӡаныҟәгаҩ Валентин Кәаӷәаниа аҿарацәа аспирантурахь бзиала шәаабеит ҳәа раҳәо, ақәҿиарақәа рзеиӷьаишьеит.
«Ишәыдысныҳәалоит! Иахьа раҧхьаӡакәны шәшьапы ҭашәыргылеит аҧсуа ҭҵаарадырра ашҭа. Ари акыр иуадаҩу, аха ихьӡырҳәагоу усуп. Уаҵәтәи Аҧсынра амш, аразҟы зчаҧо шәара шәоуп. Анаука – аҳәынҭқарра аҵаргәа хадақәа иреиуоуп. Убас еиҧш иҟалааит, шәара шәыла аҧсуа наука ӷьацеит, ҧхьаҟа ицеит ҳәа шәыхьӡ-шәыжәла рҳәо», – иҳәеит Валентин Кәаӷәаниа.
Валентин Кәаӷәаниа иазгәеиҭеит, аспирантцәеи урҭ рнапхгаҩцәеи қәҿиарала ҧшьышықәсатәи русеицура ишалҵшәахо адиссертациатә усумҭақәа хыркәшаны ахьчарахьы рнагара. Апхьаҟа ирзыҧшу аҭҵааратә усураҿы ацхыраара рыҭара ишазыхио институтқәа рнапхгаҩцәеи ААР аспирантура аҟәша аспециалистцәеи.
Аспирантцәа рлекциақәа хацыркхоит жәабранмза 15 инаркны.